...... صدفة ......
قالت فاكرني قلت آه
بس الأسم مني تاه
قالت أنا كنت حبيبتك
وكنت ليك كل الحياه
ياما كتبت فيا شعرك
ياما عشت جوا حضنك
كنت أنا حياتك وعمرك
كنت ليلك وكنت فجرك
حتي إسمي كان غنوة عندك
من حروفه نظمت شعرك
بس نسيتني مرة واحدة
وكل شئ عنك مني تاه
كنت حبيبتك من زمان
إتقابلنا صدفة ف مكان
فجأة قلتلي ليه عني غيبتي
قلتلك تعرفني قلت إنتي حبيبتي
إتأخرتي ليه وعن قلبي سافرتي
قلت ده مجنون م المستشفي تاه
كملت كلامك خدني جنانك للسما
قلت زعلان منك قلتلك أنا
قلت عايشك حلم من كام سنة
إسمعيني راح تعرفي مين أنا
خدت قلبي ف لحظة بجرأتك
قلبي قاللي أمشي ف سكتك
معرفتش دنيا تاني غير دنيتك
سيبت نفسي وعشت بيك
كنت زي طفلة وأنا بين إيديك
سلمت كل غالي عندي ليك
بس باين فرحتي صعبت عليك
عشرين سنة معرفش انت فين
ليك حق تقوللي إنتي مين
أنا حكاية كانت من سنين
وانت حكاية عمري لمنتهاه
بعدك كل شئ مني راح وتاه
ضحكتي فرحتي طعم الحياه
لسة عايشة بحبك لسة نبضك
بأسمعه كأني لسة جوا حضنك
لسة مخدتي مرسوم عليها صورتك
لو تعرف فرحتي لما شفتك
مهما عدت بيا السنين شايفاك
مهما تتغير ملامحك عارفاك
مهما غيبت عني بستني لقاك
أصلي لسة عايشة بهواك
قوللي كام حكاية بعدي عشتها
كام واحدة كتبت شعر ف إسمها
وبعد قد إيه رحت لغيرها وسيبتها
وكام واحدة كان حضنك عشها
ياحكاية حب عشتها ومكملة
عايشة سنين عمري سنة بسنة
يافرحتي وضحكتي ودمعتي ياأنا
يادنيا معاك إنت بس شفتها
كنت فاكرة إن إسمي عللسان
كنت فاكرة إني لسة ليا مكان
كنت فاكرة إن ما فاتش الأوان
لقيتني حكاية عشتها كام سنة
سلم عليا خليني ألمس إيديك
خليني أحس بأول لقا ليا بيك
خليني أعيش تاني وهم حبي ليك
رجعلي عمر من سنين مني تاه
.......
أيمن بلال
ليست هناك تعليقات:
إرسال تعليق