الشاعر/ عبده النجار

وفيه أوقات
نحس بغربه مع ناسنا
وتيجي ساعات
نكدب فيها احساسنا
انين واهات
بنكتمها في انفاسنا
في عز الصمت وبقوه
تموت فينا الآمال جوه
نعيش في دنيا مالها اساس
خلايق عايشه مهمومه
ملامح وجه مرسومه
و معدومة وليه تنداس
نعيش دنيا بكل مافيها
ونتمني في معانيها
تعبنا فيها واندسنا
بكل شقاها وغرورها
ورغم سيرها ومرورها
بتتضحك عاللي يجبرها
تكون وياه بسجن هواها تحبسنا
تعبنا فيها ملينا
شربنا المر وشقينا 
صبرنا فيها مالقينا
غير سجنها وسجان
يخاف نهرب بكل قوه يحرسنا
نعيد الكره من تاني
ونتاكد بأن حلوها فاني
ونتنهد وبنعاني
يموت الحلم جوانا
ونلقانا
فقدنا معاني احساسنا 
وتيجي ساعات
نحس بغربه مع ناسنا
وفيه اوقات
بننسي الحس واساسنا
لادنيا فيها يوم فرحه
فنرجع للالام تاني
ونكتمها في أنفاسنا
(وفيه اوقات)
(عبده النجار)