السراب بقلم الشاعر/ مصطفى القندوسي

السراب.

بنجوم الليل
ابديت نحسب
مزروب امعذب
تالف امغرب
لاه يا ليام
لاه يا الليالي
منتوف امكصب
بارد امكمد
عركان امصهد
فينك يا انهار السعد
خايف نتصيد
على اهواك ياليام
على ايامك يالعوام
امكابر امجاهد
ريشي اتساس
الجلد على قد الجهد
نلبس صبري ونتفكد
انغنسو على حر لجمار
امنين تزند
انكمد اجراحي
فصمعتي نزهد
على اتراتيل قلبي انقرد
نقراهم باللحن لمجود
اعليك ياازمان
عاد الفكرون فلحليب ايخوض
اعليك يا ازمان
عاد الخايب فالقوم ايكود
اعليك يا ازمان
عاد الطايح تحت القبة
والشريف امرمد
الله اعليك يا ازمان
الجهد اقلال
الريش منتوف
الطريق اطويلة
المونة اقليلة
الهم رشاني
محال نوصل
الارض هاني فيها
السما ماقديتلو بجهد
خليني يا الراس التايه خليني
فدروب الغيوان
تايه فالطرقان
الدرب اطويل
المال اقليل
العاشق اذليل
الزين اجميل
واش ايبرد لغليل
ابحال الما عاد اسراب
ابدال لهوا عاد اضباب
كلشي بالمكتاب
انا فلعطش ولعذاب
اشحال من حيلة واسباب
غيم الحال اعلينا
دالوقت واش داير فينا
اهنا ولهيه
السراب يلهف
احسن عونك يا العاشق فيه

بقلم مصطفى القندوسي